150 ka establisamento maka-serve na og bino

CEBU, Philippines — Dunay 150 ka mga establisamento sa Dakbayan sa Sugbo nga nahatagan og special permits aron sila makadalit og ilimnon nga makahubog ngadto sa ilang mga parokyano karon nga ang gilibkas na ang liquor ban sa siyudad.

Ang pangulo sa Cebu City Business Permit and Licensing Office nga si Jared Limquiaco miingon nga gawas sa 150 special permits nga ila nang nahatag duna pay 20 ka establisamento ang nag-apply para niini.

Ang mga establisamentong  gustong mokuna niining special permit kinahanglang makapasar sa himuong inspeksyon sa BPLO kun angayan ba silang hatagan.

Samtang ang Emergency Operations Center nagpadayon usab sa ilang training para sa mga Health Infection and Prevention Control Officer sa mga nagkadaiyang establisamento ilabi na kadtong mga nagkuha og liquor special permits.

Kining mga HIPCP maoy magsilbing protocol officers aning maong mga establisamento nga gustong modalit og mga ilimnong makahubog ngadto sa ilang mga kustomer.— IBM (BANATNEWS)