CCPO motabang pagguba sa ilegal nga STL booths

CEBU, Philippines — Andam ang Cebu City Police Office (CCPO) nga mohatag og assistance sa mga sakop sa Prevention, Restoration, Order, Beautification and Enhancement (PROBE) sa pagpatuman sa direktiba ni Cebu City Mayor Edgardo Labella sa pagguba sa mga ilegal nga Small Town Lottery booth. Kini human nga gihingusgan karon sa kapolisan ang problema sa ilegal nga STL diin nasayran nga nibalik diha sa kadalanan ang mga ilegal nga operator.

Sayo pa, gihagit na usab sa general manager sa Philippine Charity Sweepstakes Office (PCSO) Royina Garma ang kapolisan sa mga dakbayan sa Mandaue ug Cebu nga palig-onon ang ilang operasyon sa pagdakop batok sa operators sa ilegal numbers game.

Matud ni Garma nga aduna sila’y P10 milyones nga alkanse nga unta kita sa Cebu City matag adlaw diin walay otorisadong STL ang naglihok sa siyudad.

Ang kapolisan niawhag usab kini sa kabarangayan nga motabang kanila aron daling matumbok ang lugar nga adunay mga nag-operate og ilegal nga STL.— Rowena D. Capistrano/BDB (BANATNEWS)