Trapiko gilaomang mohuot atol sa checkpoint panahon sa curfew
CEBU, Philippines — Gilaoman nga makasinati og kahuot sa trapiko ang Dakbayan sa Sugbo matag oras sa curfew tungod sa pagpahugot unya sa checkpoint diha sa kadalanan.
Kini ang gibutyag ni Police Colonel Josefino Ligan, direktor sa Cebu City Police Office.
Matud ni Ligan nga human gilibkas ang liquor ban sa siyudad pahugtan na usab nila ang checkpoint sa mga kadalanan atol sa oras sa curfew alas 11:00 ngadto sa alas 5:00 sa buntag.
Atol sa curfew kadtong mga biyahedor nga moagi sa checkpoint pangutan-on sila sa ilang padulngan ilabi na sa maong mga oras nga anaa pa sila sa kadalanan naglaroy-laroy.
Ug kong aduna kini balido nga rason mahimo ra kining makalakaw apan kong wala i-hold sila aron kuhaan og profiling.
Ang mga malapason i-turn over kini sila ngadto sa temporary holding facility nga nahimutang diha sa Barangay Cogon Ramos.
Dugang ni Ligan nga gilaomang mohugot ang trapiko panahon sa gabii sugod karong pipila ka adlaw atol sa pagpahugot nila sa mga checkpoint. BDB (BANATNEWS)
- Latest
