Nasunogan sa Basak San Nicolas makabalik gihapon

CEBU, Philippines — Mideklarar og State of Calamity ang Barangay Basak San Nicolas sa Cebu City kagahapon human duha ka Sitio sa ilang barangay ang naigo sa sunog niadtong adlaw’ng Domingo, Mayo 9, 2021.

Unang naigo sa sunog ang Sitio Caimito diin walo ka balay ang naapektuhan, upat niini ang hingpit gyud nga naugdaw; paglabay sa pila ka oras laing sunog ang miigo sa Sitio Seaside Alumnos ug 117 ka panimalay ang naugdaw.

Matud ni Basak San Nicolas Barangay Captain Norman Navarro karon nga nadeklarar ang state of calamity makagamit na sila sa calamity fund sa barangay aron magamit pagtabang sa mga nasunogan.

Giangkon ni Navarro nga gamay gyud kaayo ang dalan padung sa Sitio Seaside Alumnos nga nakapalisod sa mga bombero. Nakapasamot sa problema ang kasikit sa mga balay nga ginama sa gaay ug ang kusog nga hangin.

Ang luna nga nasunogan iya sanapan sa tubig sa dagat mao nga iya kini sa gobiyerno. PPlano karon nga abunohan og yuta ang dapit.

Si Division for the Welfare of the Urban Poor (DWUP) head Simeone Romarate miingon daan nga dunay planong abunohan ang lugar ug ibutang una og temporaryong dapit ang mga nasunogan samtang abunohan ang lugar.

Kun mahuman na og reclaim ang dapit isunod dayon ang subdivision plan scheme diin ang tanan patas nga mahatagan og luna aron matukoran balik sa ilang mga balay.

Sa datos sa Cebu City Fire Office ang maong sunod midanyso og P1.2 million diin duha ka tawo ang naangol sa maong hitabo nga pulos nakaangkon og first degree burns sa bukton.— Rowena Capistrano/IBM (BANATNEWS)