Barangay kapitan nalutsa’g warrant gidakop

Cebu, Philippines — Arestado ang barangay kapitan sa  Barangay Magdugo sa Siyudad sa Toledo pinaagi sa warrant of arrest human siya gikasohan tungod sa wala paghatag sa sweldo sa iyang mga empleyado didto sa Misamis Occidental.

Ang gidakop mao si Kapitan Walter Lao, 46,  residente sa maong lugar. Ang warrant of arrest gipagawas niadtong Pebrero 9, 2021 pinirmahan ni Judge Roy Pabriga Muralion, Pairing judge sa Regional Trial Court Branch 12 Oroquieta City, Misamis Occidental. Si Lao gipasakaan og kasong paglapas sa Republic Act 6727 o Wage Rationalization Act ubos sa Labor law.

Matud pa ni Police Lt. Colonel Junnel Caadlawon, hepe sa Toledo Police Station nakapiyansa dayon og P24 mil si Lao alang sa temporaryo niining kagawasan nianang adlaw nga siya gidakop. Sumala pa sa hepe adunay negosyo si Lao didto sa Misamis sa wala pa siya mibalhin sa Toledo.

“Taga Mindanao gyud ni siya unya naka (puyo) man ni siya diri kay na barangay captain man sad siya diri,” dugang ni Caadlawon. (BANAT NEWS)