Kalihokan sa pista sa Cebu City ug Bantayan dili itugot

Cebu, Philippines — Bisan og nagkaubos na ang kaso sa COVID-19 sa Dakbayan sa Sugbo apan si  Konsehal Joel Garganera, deputy chief implementer sa Emergency Operation Center  niawhag sa katawhan nga likayan gihapon ang pagpahigayon og mga kalihokan sa pista.

Matud ni Garganera nga ilang giawhag ang opisyales sa simbahan, barangay ug kapilya nga wala lang usay ipahigayon nga mga kalihokan sa pista paglikay sa pagtapok-tapok.

Giklaro ni Garganera nga wala pa sila’y gitugotan karon nga mga kalihokan sa pista ilabi na ang mga prosisyon o mga kalingawan matag gabii samtang nagdagan ang pangilin.

Ug kalapasan gihapon sa health protocols ang mga kalihokan nga ipahigayon ilabi na kong wala kinipermit.

Nasayran nga ubay-ubay sa mga barangay ang magpista sa buwan sa Mayo ug anaa usab ang Santa Cruzan o Flores De Mayo.

Sa laing bahin, dili usab itugot sa Lungsod sa Daanbantayan ang mga kalihokan sa mga pista sa barangay matag gabii.

Si Mayor Sun Shimura niluwat og memorandum ngadto sa mga kapitan sa barangay kalabot niini.

"All barangay captains are hereby directed to disallow the holding of fiesta-related events beyond 5:00 in the afternoon except for Holy Mass that may be scheduled after the restricted time", tipik sa memorandum nga giluwatan ni Shimura niadtong Mayo 5, 2021.

Ang mga kalihokan nga walay dagkong tapok mamahimo kining ipahigayon gikan sa alas 6:00 sa buntag hangtod sa alas 5:00 sa hapon.

Ang maong direktiba ni Shimura subay kini sa pahimangno ni Presidente Rodrigo Duterte ngadto sa mga mayor ug mga kapitan sa barangay nga walay itugot nga panagtapok subay sa kapistahan aron dili sila mag-atubang og reklamong kriminal ug administratiba.—  Le Phyllis F. Antojado (BANAT NEWS)