COMELEC padayon ang pagpang rehistro sa mga botante
Cebu, Philippines — Mikabat na sa 307,560 ang registered voters sa first district sa Cebu City base kini sa nagpadayong registration sa commission on elections.
Suma ni Election Officer Omar Mamalinta sa 307,560 naa sa 163,384 ang babaye samtang ang lalake naa sa 144,176.
Gitataw ni Mamalinta nga tungod kay pandemic man dili nila mapugos ang mga tawo moadto sa ilang buhatan apan nagpadayon ang ilang panawagan sa katawhan nga magpa- rehistro
Ang COMELEC nag-awhag sa mga tawo nga magpa online appointment pinaagi sa comelec.gov.ph ug didto na mag fill-up og registration form.
Kun mahatagan na og schedule ang buhaton nalang nila inig adto sa COMELEC office mao ang pagkuha sa ilang biometric data sama sa photograph, signature ug thumbmark.
Giklaro hinoon sa COMELEC nga tungod kay dili man tanan naay access sa internet kadtong mga walk-ins nga naa nay form daan ilaha ra kini nga dawaton apan unahon sa pag-asikaso kadtong duna nay appointment.
Namatikdan nga midagsa ang mga tawo diha sa buhatan sa COMELEC Cebu City nga dunay nagkalain-laing nga tuyo gawas sa pagpa-rehistro.
Suma pa ni Mamalinta nga dunay gihimo nga lakang ang COMELEC Cebu City aron masiguro nga masunod ang minimum health protocols.
“Aduna tay mga kapulisan nga nagbantay sa gawas, naa sa North naa sad sa South District at the same time aduna pud tay personnel nga from time to time moadto sa gawas to check if the applicants are really observing the health protocols, the social distancing”, ni Mamalinta pa.
Gipahibawo sab ni Mamalinta ang schedule sa ilang registration magsugod Lunes hangtud sa Huwebes ug sa Biyernes maoy disinfection day nila. (BANAT NEWS)
- Latest