Grupo sa aborsyonista napuhag sa NBI

CEBU, Philippines — Lima ka mga gipasanginlang mga aboryonista ang nasikop pinaagi sa entrapment operation sa mga tinugyanan sa National Bureau of Investigation Central Visayas sa managlahi nga lugar sa Dakbayan sa Sugbo ug Talisay.

Giila ang lima nga mao sila si Gloria Gabutin,61;  Meryteissie Rural,59; Amparo Gemarangan,82;  Francisca Rebamonte,42;  ug Joey Guirigay, 38.  Si Guirigay maoy gitumbok nga lider sa grupo ug maoy admin sa social media account niini sa Facebook nga nagdala og pangalang Michelle Mayer, o  Jannah OB/Gyne.

Sila si Rural, ug Rebamonte maoy giingong tighatud sa pasyente ngadto sa Talisay o ba kaha diha sa may dalan A. Lopez sa Dakbayan sa Sugbo diin giingong nahimutang ang ilang klinika.

Giingong si Gemarangan maoy nagdala sa klinika sa Barangay Mojon, Dakbayan sa Talisay samtang si Gabutin ang sa A. Lopez , Barangay Labangon. Matud pa nga anha sa social media mangrekrut ang grupo og mga mabdos nga gustong magpataktak sa gisabak.

Matud pa dunay duha ka packages nga kapilian, ang una nagkantidad og P30 mil kun diin usa ka lisensyadong OB/Gyn nga doktor ang mohimo gamit ang suction tool ug ang ikaduhang opsyon mao ang pagpainom og abortion pill nga mokantidad sab og P9 mil.

Ang grupo mi-advertise pinaagi sa social media sa ilang serbisyo ubos sa account nga Michelle Mayer ug Jannah OB/Gyne, apan diay to si Guiringay ra ug dili sab kini medical professional kondili computer programmer nga taga Tagbilaran City sa Bohol.

Si Atty. Renan Oliva, direktor sa NBI-7 miingon nga gamit ang ilang mabdos nga ahente gisuwayan nila pagkontak ang grupo.

Niadtong Abril 29 nagkasabot ang ahente sa NBI-7 ug ang grupo ug gidala kini ni Abatayo sa Brgy. Mohon sa Talisay sa balay ni Gemarangan hinungdan sa pagkaaresto sa duha. Si Gemarangan mihimakak sa pasangil kay matud niya tambag ra iyang mahatag bahin sa family planning matag dunay moanha sa ilaha.

“Di man ko mudawat ingon ani, ila jud kong gi angin ani, wa jud koy knowledge ingon ani...wala gyud (abortion),”pasumangil pang Gemarangan.

Sa follow-up operation diha sa A. Lopez nadakpan sab si Gabutin u gang assistant niining si Rural. Ang duha parehong mihimakak sa pasangil kanila.

Si Oliva miingon nga ang intentional abortion adunay silot base sa Article 256 in Relation to Section 8 Conspiracy under the Revised Penal Code and RA 10175 or the Cybercrime Prevention Act of 2012.

“Nganong naay cybercrime? Ang advertisement aning abortionist niagi sa Facebook...so ang medium nga gigamit sa ilang advertisement for the criminal act, Facebook,” matud ni Oliva.

Nagtuo si Oliva nga daghan nang krimen nga nabuhat ang grupo tungod kay base sa ilang impormasyon sukad pa niadtong tuig 2011 nag-operate ang grupo. –Rowena Capistrano/IBM (BANATNEWS)