Pesquera: Gidaghanon sa personnel sa NOAH magpabilin

CEBU, Philippines — Ang gidaghanon sa personnel diha sa New Oasis for Adaptation and a Home (NOAH) sa South Road Properties magpabilin bisan og gamay na lang ang nahibiling pasyente sa maong pasilidad.

Si Atty. Joy Pesquera, manager sa NOAH nibutyag nga ang maong pasilidad adunay 80 ka empleyado nga gilangkuban sa mga doktor, nurse, barangay health workers, administrative personnel, logistics personnel, guards, janitors, ug drivers.

Ang NOAH complex usa ka pasilidad nga mo-cater sa COVID-19 positive patients category 1 pasabot niini kadtong mga pasyente nga asymptomatic o walay sintomas sa virus.

Matud ni Pesquera nga 60 na lang ang kasamtangang pasyente  sa maong pasilidad.

Nasayran nga 450 ka pasyente ang ma-akumodar sa NOAH.

Giingong usa sa mga hinungdan nga pagmenos sa gidaghanon sa mga pasyente sa NOAH mao ang pagbalik sa operasyon sa barangay isolation centers ug mga hotel nga modawat og mga tawo nga nagpositibo sa COVID-19.

Ug makita usab ang pagkunhod sa kaso sa COVID-19 sa siyudad.

Base sa  datos sa  Department of Health-7 niadtong Mayo 1, ang Cebu City adunay 51 ka bag-ong kaso sa COVID-19, niabot sa 839 ang active cases ug  61 ang bag-ong recoveries. BDB (BANATNEWS)