‘Lapu-Lapu’ atraksyon pa gihapon sa Crocolandia

CEBU, Philippines — Naa na sa pangidaron nga 64 anyos si Lapu-Lapu nga makit-an sa Dakbayan sa Talisay. Dili kini ang bayaning si Datu Lapu-Lapu nga naila sa tanan kundi ang buaya nga usa sa mga makita sa Crocolandia sa Barangay Biasong, Dakbayan sa Talisay.

Si Lapu-Lapu usa ka lalaking buaya, usa kini ka saltwater crocodile nga makita sa mga hilit nga mga katunggang lugar sa Pilipinas didto sa Palawan ug sa Mindanao.

Aron malingaw ang hunahuna sa mga turista ug mga kabataang nag educational tours sa maong dapit, giparesan si Lapu-Lapu ug babayeng buaya nga gipangalanan sab og Magellan. Apan subo lang nga si Lapu-Lapu sayong nabiyudo human namatay si Magellan.

Ang mga buaya nga makita sa usa ka ektaryang zoo sa Syudad sa Talisay tipik lang sa 80 ka hayopan nga gibuhi aron malingaw ang kabataan ug ang katawhan nga mobisita.

Si Abby Lloren, assistant manager sa Crocolandia miingon nga nakasinati sab sila og kalisod sa pagsugod sa pandemiya tungod kay wala sila midawat og bisita mao nga bisan lawog sa mga hayopan lisod pangitaon sanglit wala silay kita.

Apan tungod sa ilang determinasyon ug pagsalig nga mobalik ra sa normal nilahutay sila sa pagamuma sa ilang mga binuhing hayop sa zoo.

Matud niya gibuhat nila kini aron nga kun matugotan na ang mga bata nga makagawas sama sa kaniadto adunay mabalikan ang mga kabataan diha sa Crocolandia.

Naglakip sa mga makitang hayop diha sa Crocolandia mao ang ostrich, tortoise, hornbill, peacocks, deer, Agila, unggoy ug uban pa.

Nagpasalamat ang nagdumala nga karong giluagan na ang restriksyon aduna nay pipila ka mga tawong nibisita.

Gipasalig niya nga higpit nilang gipatuman ang health protocols subay sa gimando sa gobiyerno.

Ang entrance fee sa mga hamtong naa sa P200 ug P150 alang sa mga bata.— IBM (BANATNEWS)