Motorista makasinati og kahuot sa trapiko sa Minglanilla

CEBU, Philippines — Gipahimangnoan ang mga motorista nga moagi sa dalan sa Lungsod sa Minglanilla nga mabara ang dagan sa trapiko gumikan sa pag-ayo sa karsada haduol sa dakung mall sa  maong lungsod.

Ang mga sakop sa Minglanilla Traffic Commission (MITCOM) nihangyo sa mga motorista nga mosayo sa ilang mga lakaw aron dili maapektohan sa pagkabara sa trapiko.

Ang City of Talisay-Traffic Operation Development Authority (CT-TODA) mihatag sab sa maong pahimangno tungod kay maapektuhan man usab niini ang ilang hurisdiksyon.

Samtang sa laing bahin gipaubos sa pagbansay-bansay ang 91 ka mga sakop sa Minglanilla Traffic Commission (MITCOM) sud sa pipila ka adlaw.

Kini aron sila mapahinumdoman sa lagda sa trapiko ug ang ilang responsibilidad isip tinugyanan sa balaod.

Gilakip sa ilang pagbansay kung unsaon sa pagpatuman sa lagda sa karsada nga aduna sab kini kasing-kasing sa isig ka tawo.

Usa ka ehemplo niini mao ang pagtabang sa mga motorista nga magub-an sa ilang sakyanan aron sab nga dili makabalda sa dagan sa trapiko.

Gawas sa mga MITCOM gilakip sab nila og bansay ang 20 ka sakop sa task force.

Ang task force mao sab ang kaabag sa mga MITCOM sa ilang pagpatunhay sa karsada. MEL (BANATNEWS)