9 mil doses sa bakuna naabot
CEBU, Philippines — Magsugod na og balik ang Cebu City Government sa pagpamakuna sa mga senior citizens ugmang adlawa Lunes, Mayo 3,2021 human ang siyudad gihatagan og 9,000 doses nga Sinovac vaccines gikan sa Department of Health Central Visayas niadtong adlaw’ng Biyernes.
Si Dr. Jeffrey Ibones, pangulo sa Cebu City Health Department miingon nga mobalik ang operasyhon sa tulo ka vaccination sites sa siyudad nga mao ang Robinson’s Galleria, University of Cebu Senior High School Building Banilad Campus ug SM Seaside City Cebu.
“Encourage gyud namo nga kato lang amoang gi-inform, gitextsan or gi-scheduled mao ra gyuy atoang i-entertain,” asoy ni Ibones nga ang gipasabot mao kadtong mga senior citizens nga gipadad-an og text nga sila bakunahan maoy paadtuon aron dili magdasok ang mga tawo sa lugar.
Apan kun dunay mga medical frontliners nga mo-walk in dawaton gihapon apan kinahanglang alas-3 sa hapon sila mangadto sa vaccination areas.
Sigon ni Ibones ang 9,000 doses kun masunod ang target nila nga kung makabakuna og 500 ka tawo kada vaccination site, mahuman nila kini sulod sa unom ngadto sa pito ka adlaw. Mao nga gihangyo sa Cebu City Government ang mga senior citizens magparehistro online aron makita sa Department of Health nga daghan ang nagparehistro daghan pud ang ihatag nga doses sa siyudad.
Base sa datos sa Cebu City Health, niabot na sa kapin 28,000 ka mga senior citizens ang nagparehistro ug sa maong gidaghanon naa sa 20,000 ang ni ‘yes’ nga magpabakuna.
Paningkamutan sa Cebu City Government nga makasugod na sab sila sa vaccination sa mga tawo nga ubos sa A3 prioroty o kadtong dunay mga ‘comorbidities’.
“Amo pa na i-strategize unsaon kay daghan baya kaayo ang A3,” si Ibones pa.— IBM (BANATNEWS)
- Latest
