Suholan sa medical JOs mahatag sunod semana

Cebu, Philippines — Gipaabot mga masuweldohan na sunod semana ang tanang medical workers nga job order sa Cebu City Medical Center (CCMC) ug Cebu City Quarantine Center (CCQC) kansang suholan nalangay og maayo hinungdan nga ang uban nangreklamo.

Nangayo karon og pasaylo si City Administrator Floro Casas Jr. sa  tanang job orders kalabot sa pagkadelatar sa ilang mga suweldo sulod na sa upat ka buwan.

Gilangkoban kini sa mga doktor, nurse ug uban pa. Giangkon gyud niya na-delay gyud ang sweldo tungod duna silay gisunod nga proseso.

Usa pa, kini maong mga JOs nga gi-hire tungod sa panahon sa emerhensya ug wala naapil sa annual budget maong gipangitaan pa kini kun asa kuhaon.

Gipasalig niyang sa sunod semana mahatag na ang ilang sweldo karong ang mga dokumento bahin niini naabot na sa iyang buhatan.

Ang siyudad dunay 98 ka JO medical workers nga upat ka buwan nga wala masuholi. Gipaabot nga kompleto upat ka buwan ang ilang madawat sa sunod semana.

Sumala pa ni Casas kining maong dugang JOs gikuha sa panahon nga nisaka ang kaso sa COVID19 niadtong Enero ug gibutang sa CCMC.

Nakakuha gyud sila og budget sa disaster funds  ug naaprobahan kini sa ikatulong semana niadtong Marso.

Bisan niubos na ang kaso sa COVID19 karong buwana, gibutyag ni Casas nga magpadayon gihapon ang kontrata sa mga JO sa CCMC ug CCQC sanglit gikinahanglan paman ang ilang serbisyo. (BANAT NEWS)