Grupo sa transportation sector nagpakitabang kang Mabatid
Cebu, Philippines — Gitinguha karon ni Cebu City North District Councilor Prisca Niña Mabatid nga matabangan sa pagpangita og pamaagi ang traditional public utility jeepney (TPUJ) operators nga makautang og mga modernized PUJ pinaagi sa abag sa mga kooperatiba, Land Bank ug Development Bank of the Philippines (DBP).
Gibutyag ni Mabatid nga pipila ka grupo sa transportation sector ang nidangop kaniya ug nangayo og tabang tungod kay lisod na ang kahimtang sa PUJ drivers.
Si Mabatid kinsa chairperson sa committee on labor, employment, cooperative, and livelihood sa konseho sa siyudad nagkanayon nga angayang hatagan og dinaliang pagtagad ang suliran sa sektor sa transportasyon ilabi na nga adunay gibuhi nga pamilya ang mga drayber.
Gikataho nga pipila ka PUJ operators ang nitiyabaw na sa ilang sitwasyon tungod kay nangalata na ang pipila nila ka units diin usa ka tuig na kini nga wala nagamit.
Sa laing bahin, nikabat sa 243 ka Talisaynon ang nakadawat og tag 5 mil isip pinansiyal nga hinabang ubos sa programa sa Department of Labor and Employment.
Ang nahisgutang programa mao ang “Tulong Panghanapbuhay sa Ating Disavantage/Displaced Workers.
Nasayran nga dili lang ang mga nawagtangan og trabaho ang nakabenepisyo sa maong hinabang lakip na niini ang nasunogan, mga naapektahan sa pag-demolish ug sa mga drug addict kinsa nipaubos og rehabilitasyon ug andam nga mag-usab.
Samtang ang 113 ka pamilya nga biktima sa sunog sa Barangay Tabok, Dakbayan sa Mandaue ang gikatakdang hatagan usab og pinansiyal nga hinabang sa siyudad aron magamit nila sa pagpatukod og balik sa ilang mga balay. - Gabriel C. Bonjoc, Romeo T. Limpangog ( BANAT NEWS)
- Latest
