PJ natahap sa grupo ni Ligas

Cebu, Philippines — Gitataw sa grupo nga nagpaluyo sa “Gwen Garcia for Senator Movement” nga walay nagpaluyo nga partido sa ilang awhag nga padaganong senador sa 2022 election si Garcia.

Si Edward Ligas, usa sa mga convenor sa grupo nagkanayon nga wala sila gigamit sa bisan kinsa o unsa nga partido.

Si Kongresista Pablo John Garcia sa 3rd district ug manghud sa gobernadora natahap nga posibleng lakang lang kini aron mahawa ang iyang maguwang sa Kapitolyo ug adunay makadagan nga lain gikan sa ubang partido aron maoy molingkod diha sa Kapitolyo.

Apan matud ni Ligas nga wala sila’y laing nakita nga mamahimong modagan nga “full blooded Cebuano” pagkasenador ang gobernadora ra.

“We can see no other leader except Gwen. The Osmeñas wala na. Walay leader nga adunay national stature. Gwen is the most well-known governor in this country. Cebu is the biggest voting province with almost 4 million voters so Gwen has the chance”, pasabot ni Ligas.

Apan si Gwen una nang nagkanayon nga wala siya’y planong modagan sa national nga position tungod kay modagan ra gihapon siya og balik pagkagobernador sa Lalawigan sa Sugbo. (BANAT NEWS)