Illegal recruiter na-entrap

CEBU, Philippines — Usa ka babaye ang gidakop sa mga sakop sa National Bureau of Investigation (NBI-7) human kini gireklamo nga usa ka illegal recruiter og mga tawo nga nangandoy makatrabaho sa abroad.

Giila ang suspek nga si Juvelyn Delos Trico, 27, taga Barangay Lahug syudad sa Sugbo kinsa nadakpan atol sa entrapment operation nga gihimo sa NBI-Central Visayas niadtong Abril 27,2021 sud sa usa ka mall sa siyudad sa Sugbo.

Matud ni NBI-7 Director Renan Oliva duha ka biktima ang nidangop sa ilang buhatan ug mialegar nga ang suspek ilegal nga nang-recruit og OFWs isip customer service didto sa Singapore ug Dubai.

"Ang ilang trabaho kuno, represented by this delos Trico is U-Drive for customer service employees. Ang promise sa ila kay P80,000 to P90,000 a month ang ilang sweldo, free board and lodging, free airline ticket if mouli," matud ni Oliva kinsa midugang nga P200 mil ang pangayo processing fee sa suspek.

"Ang usa ka complainant niabot og P190 mil ang iyang nabayad kay ang iyang credit card gigamit hasta sa airplane ticket from Manila-Singapore to Dubai nga libre man unta ang ticket maoy promise sa ila," dugang ni Oliva.

Ang mga biktima gipasumiter pa sa ilang passport, medical certificate ug ubang dokumento para kuno sa ilang employment.

Si Sheena Faustino usa mga reklamante nagkanayon nga misalig siya sa suspek tungod kay kauban sila kaniadto sa gitrabahoan nilang call center company.

"Iya kong gi-recruit kay nag direct hiring daw sila. So mao to sige na siya’g pangayo nako og kwarta para sa akong papeles unya walay travel agency ni kay direct hire," matud ni Faustino.

Sumala pa sa NBI-7, niadto pang 2019 kini gi-recruit ug gisaarang makalarga sa tuig 2020 apan hangtod karon wala gihapon sila ma deploy.

Ang pagpang-recruit gipaagi niini sa Facebook ubos sa mga alyas nga Kyrie Ghat Cruz, Ghat Dela Cruz Delostrico ug Zeke Kyrie.

Apan si delos Trico nihimakak nga illegal recruiter siya. Matud niya igo ra siya nitabang sa iyang mga higala nga makatrabaho sa abroad.

Nagatubang karon og reklamong estafa ug illegal recruitment in relation sa Cybercrime Law si delos Trico.

Ang ikaduhang biktima usa ka lalaki nga mialegar nga gi-recruit sab kini ni delos Trico nga mag-invest. Matud niini ngadto sa NBI, nakahatag na siya og P50 mil sa suspek apan wala na kini mabalik.— /IBM (BANATNEWS)