Brgy Tanke kumustahon ni Sinas karon
CEBU, Philippines — Gikatakdang mobisita si PNP Chief Debold Sinas sa Barangay Tanke, Dakbayan sa Talisay karong adlawa (Abril 30,2021) isip pinasidunggang dinapit ug mamumulong sa pag turnover sa upat ka pampublikong pansayan ug pagpahurar sa 80 ka anti-crime volunteers nga gitawag og Tanke Defenders.
Si Police Lt. Col. Gerard Ace Pelare, pangu sa Talisay City Police Station niingon nga si Mayor Gerald Anthony “Samsam” Gullas Jr. maoy miimbitar ni Sinas.
Matud pa ni Pelare nga nanglayas ang mga ilegalista sa Tanke gumikan sa ilang paningkamot nga pirme sila na sa lugar.
Kahinumdoman, si Sinas kaniadto maoy maglingkod isip direktor sa Police Regional Office (PRO-7) sa dihang nalakip ang Tanke sa pamahayag si Pres. Duterte nga naghitak ang drugas.
Gusto karon ipakita sa Talisay kang Sinas ang dakong kausaban sa Tanke nga resulta sa gipangusgang kampanya batok sa ilegal nga drugas diha sa maong barangay.
Dili lang paggukod sa ilegal nga drugas ang gipangusgan kondili hasta ang pagpaduol sa kapolisan sa mga molupyo sa maong barangay aron dili na sila mangahadlok pagsumbong kung kinsa ang mga tawong nalambigit sa ilegal nga drugas.— IBM (BANATNEWS)
- Latest