21 anyos nga lalaki gipusil patay

CEBU, Philippines — Usa ka 21 anyos nga lalaki ang gipusil patay sa wala mailhing mamumuno sa may sitio Laguna 2, Barangay Cogon Pardo ning Dakbayan sa Sugbo, Miyerkoles sa gabii.

Ang biktima naila nga si John Lester Bernales, residente sa maong lugar.

Segun sa inisyal nga imbestigasyon sa kapolisan giingon nga nagtambay ang biktima dili layo sa ilang balay gikan nga nanihapon, dihang niabot ang wa mailhing mamumuno ug kalit nga namusil.

Ang biktima nakaangkon ug pipila ka samad pinusilan sa kalawasan nga maoy gituhuang hinungdan sa iyang hinanali nga kamatayon.

Base sa pamahayag sa mga nakasaksi giingong wala mag facemask ang nipusil patay sa biktima.

Ang kapulisan padayon pa karon nihimo og imbestigasyon aron masuta ang motibo sa maong pagpamusil.

Ang pamilya sa biktima sobra ang pagbangutan ug wala magtuo nga mao na kadto ang ilang katapusan nga panag-uban sa panihapon. —MEL (BANATNEWS)