Loreche: Adunay facilities mabutangan sa Sputnik V vaccines

CEBU, Philippines — Ang rehiyon-7 aduna kini facilities nga mabutangan sa Sputnik V COVID-19 vaccines gikan sa Russia.

Matud ni Dr. Mary Jean Loreche, tigpamaba sa Department of Health-7 nga ang Sputnik V nga gihimo sa Gamalea Research Institute kinahanglan og cold storage facilities nga ang temperature moabot ngadto sa 18 degrees centigrade.

Ug tungod kay ang maong bakuna nagkinahanglan man og kwarto o storage nga may Ultra Low Temperatures posibleng ang pag-transport niini limitado lang sa mga highly urbanized cities sa Central Visayas o maoy makabenipisyo niini aron dili layo ug dugay ang pagbiyahe. Dugang ni Loreche nga sigurohon nila nga mamentinar ang storage requirement ug sa pagkakaron wala pa sila masayod sa gidaghanon sa bakuna nga maabot sa Central Visayas.

Sa laing bahin, gipadayag ni Dr. Jeffrey Ibones, Cebu City Health Department officer-in-charge nga kong ugaling  mo bukas ang dugang vaccination sites sa Siyudad sa Sugbo kinahanglan na gyud nga mo-outsource sila og dugang mga personnel ug mga  doktor  tungod kay dili igo ang ilang manpower kon modaghan na ang vaccination sites.

Matud ni Ibones nga adunay posibilidad nga maapektohan ang ilang mga programa kun ang city health doctors ug personnel lang tanan ang mohupot niini. Sa pagka-karon, adunay 38 ka personnel ang city health lakip na niini ang job orders.

Sa orihinal nila nga plano, sa usa ka vaccination site nanginahanglan kini og walo ka doktor walay labot niini ang ubang health workers.

Ang ubang mga doktor sa city health nag-atiman usab kini sa mga health centers sa kabaranggayan aron masiguro nga diili maapektohan ang uban nila nga programa. —Sanden J. Anadia/BDB (BANATNEWS)