Kanunay nga pagsusi sa linya sa koryente gisugyot

CEBU, Philippines — Giawhag sa hunta probinsyal ang mga barangay nga moumol og "watch team" nga maoy momonitor sa mga residente sa ilang lugar sa kanunay nga pagsusi  sa ilang mga electrical wirings ug mga appliances ug gadgets nga gigamit aron paglikay sa sunog.

Si bokal Glen Anthony Soco niduso og resolusyon pag awhag sa publiko nga kanunay nga susihon ang mga butang nga nag gamit og kuryente.

Subay niini iyang giawhag ang mga barangay nga mag-umol og team nga maoy mosusi kun nituman ba niini ang mga residente.

Matud sa bokal nga sumala sa Bureau of Fire Protection (BFP) kasagaran hinungdan sa sunog mao ang "faulty electrical connections/wiring; sigarilyo ug kayo nga mamugna gumikan sa sulo.

Si Soco miingon nga angay ang kanunay pag monitor sa mga butang nga nag gamit og kuryente sama sa appliances, computer ug mga gadgets labina karon nga kadaghanan anaa na sa "work from home" nga pamaagi diin ang maong mga butang kanunay gyud nga gigamit. —MEL (BANATNEWS)