Mga PUJ sa Talisay nakabiyahe na sa Cebu City

CEBU, Philippines — Unom pa lang ka Public Utility Jeepney (PUJ) nga nagrota Talisay paingon sa Siyudad sa Sugbo ang nagdagan sa pagkakaron.

Duha ka semana na ang nakalabay nga nitugot si Mayor Edgardo Labella sa PUJ sa Talisay nga makasulod sa Dakbayan sa Sugbo.

Apan si Rusty Lopez, drayber sa PUJ nagkanayon nga menos kaayo ang ilang pasahero bisan sa kagamay pa lang nila nga nakakuha og special permit alang sa pagbiyahe sa Siyudad sa Sugbo.

Matud ni Lopez nga daghan na ang kapilian sa mga pasahero sa ilang pagbiyahe ug kasagaran kanila magtapok diha sa Barangay Tabunok.

Samtang si Cindy Catubig, usa sa mga pasahero nibutyag nga nalipay sila tungod kay hinay-hinay na nga nibalik ang transportasyon diin aduna na silay kapilian aron makadaginot.

Samtang si Jonathan Tumulak, hepe sa City of Talisay Traffic Operation and Development Authority (CT-TODA) nagkanayon nga gikan sa pagsugod sa pandemiya naghinay-hinay na karon og balik ang transportasyon.

Matud niya nga ila usab nga gipangandaman ang pagbalik unya sa kahuot sa dagan sa trapiko. BDB (BANATNEWS)