MOD nilusad na sa community pantry sa Carbon Public Market

CEBU, Philippines — Pormal na nga gilusad kagahapon sa Cebu City Market Operations Division ang ilang community pantry diha sa Senior Citizens Park diin tinguha niining makatabang sa mga nanginahanglan ilabi na niining panahon sa pandemiya.

Matud ni Irvin Cabales, market administrator nga nagkalain-laing klase sa pagkaon ang nidangat diha sa iyang buhatan nga gikan sa mga manindahay sa Carbon Public Market ug sa mga pribadong indibidwal nga gustong motabang ngadto sa uban nga nanginahanglan.

Sayo pa, si Cebu City Mayor Edgardo Labella nimando sa Market Operations Division nga mohimo og community pantry aron makatabang sa nanginahanglan.

Ang vendors association sa Carbon Public Market ug ambulant vendors dihang gi-meeting niadtong Huwebes sa walay nidunol dayon kini og tabang isip suporta sa community pantry nga pagahimuon.

“Bisa’g unsa ka simple nga vendor, ginagmay nga vendor nihatag gyud sila mao na ingon ana kadaghan atong nakuha karon but remember dili lang ni karong adlawa, continuous ni nga project ug everyday gasige ta’g collect og mga produkto”, matud ni Cabales.

Ang mga vendor association aduna usab kini volunteers aron motabang sa siyudad sa paglimpiyo ug pagputos sa mga pagkaon.

Gilauman nga daghang tawo ang modagsa hinungdan nga ang ilang himuong sestema dili nila ipahibawo ang dapit nga ibutang ang community pantry apan makig-alayon sila sa barangay kini aron masunod ang minimum health protocols.

“So ang mahitabo kong target nato for lunch nga gamiton nila atong ibutang og mga alas 10:00 sa buntag ug target pod nato para panihapon ari pod ta sa alas 4:00 or alas 5:00 sa hapon so mao na ato lang gyud ni tuyuon inig abot didto hikyad sa produkto one or two hours layo na kaayo mga less than an hour mahuman na then adto na sad tag laing community”, butyag ni Cabales. BDB (BANATNEWS)