Guadalupe nag-una gihapon sa daghan og kaso
CEBU, Philippines — Duna nay 21 gikan sa 80 ka mga barangay sa Dakbayan sa Sugbo ang walay kaso sa Covid-19 sulod sa napulo ka adlaw sumala pa sa Emergency Operations Center base sa talaan nga ilang gihatag.
Nag-una sa lima ka barangay nga aduna pa gihapoy taas nga kaso sa Covid-19 mao ang Guadalupe-41, Lahug-36; Tisa-30; Talamban-25; Sambag 1- 24. Ang Deputy Chief Implementer sa EOC konsehal Joel Garganera, padayon gihapon nga nag-awhag sa katawhan nga kanunay gihapon mosunod sa tanan mga gipatuman nga minimum health standard ug health protocols aron hiniusa gihapon nga batukan ang Covid-19.
Base sa datos nga gipagawas sa Department of Health Central Visayas niadtong Domingo, Abril 25, naa nalang sa 889 ang active cases sa COVID-19 sa Cebu City.
Niabot na sa 23,144 ang total cases sa siyudad human nakatala og 46 ka bag-ong kaso sa virus. Hinuon 62 sab ang dugang nangaayo na apan duna usa nga nakalas.
Ang Mandaue City adunay 14 ka bag-ong kaso ug naa sa 488 ang ilang active cases, duna say napulo nga dugang nangaayo.
Samtang ang Lapu-Lapu City nakatala og 15 ka bag-ong kaso ug naa sa 738 ang active cases niini, samtang nakatala kini og 64 ka bag-ong nangaayo.
Sa datos sa DOH-7, ang Central Visayas dunay 55,093 total cases sa COVID-19; 4,400 ang active cases; 48,792 ang recoveries ug 1,901 ang deaths.— Decemay P. Padilla/IBM (BANATNEWS)
- Latest