Swimmer nga milampos paglangoy sa Mactan gipasigarbo sa Lapu-Lapu

CEBU, Philippines — Gipasigarbo ni Lapu-Lapu City Mayor Junard Chan nga malamposon nga nalangoy ni Cleevan “Little Mermen” Alegres ang tibuok isla sa Mactan.

Miabot ngadto sa 17 oras 37minutos ug 35 segundos nga gilangoy ni  Cleevan ang tibuok 44 kilometros nga stretch patuyok sa Mactan Island, nga gisugdan niya niadtong Abril 25, 2021 sa alas 5:00 sa hapon ug nahuman alas 10:37 kagahapon sa buntag Abril 26.

Suma ni Chan, dako ang pasidungog nga gihatag ni Cleevan sa bayani nga si Lapu-Lapu ug usa usab kini sa highlights sa kasaulogan sa ika -500 ka tuig sa Kadaugan sa Mactan. Nasayran tumong ni Cleevan sa iyang paglangoy mao ang pagpadangat og mensahe kabahin sa pagprotehir sa kalikupan ilabi na sa marine life.

Si Cleevan nahatagaan ug cash incentive nga P100, 000 mil pinaagi sa resolusyon sa konseho ug P42, 000 mil gikan sa Mactan Electric Company Inc.

Samtang hugot nga seguridad ang gipatuman sa Mactan Shrine isip venue sa kadaugan sa Mactan nga ipahigayon karong adlawa April 27, 2021.

Dili sama sa nanglabay nga katuigan nga dunay daghang bisita ang maong kalihukan, tungod kay sa pagkakaron mga lokal nga actors lang ang mopasundayag.

Matud pa ni Mayor Junard Chan, ang ilang gihimo karon mao ang pagsuporta sa mga local artist, hinungdan nga walay mga artista nga gikuha gikan sa manila.

Gawas sa mga lokal nga opisyal, gilauman nga motambong ang pipila ka mga opisyal gikan sa nasudnong kagamhanan sama nila ni Executive Secretary Salvador Medialdea, nga maoy representante sa Malakanyang. —MEL (BANATNEWS)