Bakuna sa seniors nahurot

CEBU, Philippines — Nahurot og sayo ang bakuna alang sa mga senior citizens sa Cebu City maong sayo kining nahuman kagahapong adlawa sumala pa sa Cebu City Health Department.

Kahinumduman ang CCHD mipahibalo nga duna kini 5,000 doses sa Sinovac Vaccine sa dihang gisugdan ang pagbakuna sa mga senior citizens niadtong Lunes Abril 19. Daghang mga senior citizens ang niadto sa mga vaccinations sites diha sa Robinson’s Galleria, University of Cebu Senior High School building Banilad Campus ug ang bag-o lang gibuksan sa SM Seaside City Cebu.

Gipahibawo sa Cebu City Vaccination Operations Center ang 5,000 doses sa COVID-19 vaccines alang sa mga senior citizens karong semanaha nahurot na tungod sa paspas nga pagsanong sa mga senior citizens sa vaccination campaign. Sa unang adlawa sa pagpamakuna sa mga senior citizens niabot sa 793 ang nabakunahan; 1,100 sa ikaduhang adlaw; 1,144 sa ikatulong adlaw ug niadtong Huwebes niabot sa 1,377 ka senior citizens ang nabakunahan.

Kagahapong adlawa duha ka vaccination site lang ang giablihan nga mao ang SM Seaside City Cebu ug University of Cebu Senior High School building Banilad Campus kay ang Robinson’s Galleria gisira una alang sa disinfection.

Apan gipahibawo ni Cebu City Councilor Tumulak nga temporaryo nilang gihunong sayo kagahapong adlawa kay nahurot na ilang bakuna, magpaabot pa ang siyudad sa ihatag nga dugang bakuna gikan sa DOH-7.

 Base sa datos nga gipagawas sa Department of Health Central Visayas niadtong Huwebes, Abril 22, naa nalang sa 889 ang active cases sa COVID-19 sa Cebu City. Niabot na sab sa 22,991 ang mga kaso sa siyudad human nakatala og 69 ka bag-ong kaso sa virus ug 48 ang napuno sa mga nangaayo na, apan dunay usa nga nadugang sa mga nakalas.— IBM (BANATNEWS)