Empleyado sa City Hall nga nadakpan sa drug bust gitaktak
CEBU, Philippines — Gitaktak na sa trabaho kadtong casual employee sa Cebu City Government nga nadakpan sa gihimong operasyon sa kapulisan sa Block 4, Lot 8, Barangay Babag, dakbayan sa Lapu-Lapu niadtong adlaw’ng Huwebes.
Ang gidakop mao si Robeth Sable delos Santos, 36, residente sa Barangay Suba, siyudad sa Sugbo ug usa ka Administrative Aide III sa Cebu City Hall.
Siya nadakpan sa buybust operation ang kapulisan sa City Intelligence Branch (CIB) sa Lapu-Lapu City Police Office pinaagi sa pakig-alayon sa PDEA sa maong lugar. Nakuhaan si delos Santos og 158 gramos nga gituohang shabu nga mobalor og kapin P700 mil.
Si Cebu City Administrator Atty. Floro Casas Jr. miasoy gimanduan siya ni Cebu City Mayor Edgardo Labella Huwebes sa gabie sa pag-terminate ni delos Santos sa trabaho.
“Taktak na siya diretso dili gyud mopasaylo si Mayor aning mga ana nga klase sa offense kanang ma involved sa drugs either use, pushing or dealing dili gyud mo-tolerate si Mayor ana so automatic taktak gyud dayon na,” ni Casas pa.
Nasayran nga gigamit sa dinakpan ang sakyanan sa siyudad ug nakompirmar kini ni Casas nga gidala gyud kini sa dinakpan sa lugar kun diin kini gidakop.
Si delos Santos nasulod sa Cebu City Hall niadtong July 2019 ug naa kini na-assign sa sa Department of General Services (DGS) isip driver.
Si Casas miingon nga ang nahitabo ni delos Santos panaminan sa ubang empleyado sa siyudad aron dili na kini subli pang mahitabo.
Sa pikas bahin, pito ka tawo ang nasikop sa mga sakop Philippine Drug Enforcement Agency Cebu Province Team, RIU 7, CIDG Mandaue FU7, CPPO-PIU/PDEU ug Police Station 6 sa may Sto. Niño Street, Barangay Suba ning Dakbayan sa Sugbo kagahapon sa buntag.
Ang mga nasikop naila nga si Cristo Mijares, 47, subject sa buy bust tungod kay maoy nagmentenar sa drug den, ug mga sakop niini nga si Cinderella Jimenez, alias Inday,41.
Lakip sa gisikop ang mga nibisita sa drug den nga sila si Ernani Daro, 31, Rodrigo Biatingo, 28, Anthony Torbila, 18, Randy Mijarez, 35, ug usa ka 17-anyos nga water vendor.
Nasakmit gikan sa mga dinakpan ang 14 ka putos sa ginadili nga drugas nga motimbang ug 18 gramos, buy bust money ug drug paraphernalia.— Rowena D. Capistrano/IBM (BANATNEWS)
- Latest