Ginang gidauban sa selosong bana

CEBU, Philippines — Tungod sa selos gisuwayan pagsunog sa usa ka bana ang iyang asawa ug pagkahuman misuway sab kini sa paghikog Huwebes sa kaadlawon diha sa Sitio Langtad, Barangay Mangga, Tuburan.

Ang biktima 49-anyos, minyo, residente sa maong dapit samtang ang iyang bana 47-anyos. Ang duha parehong gidala sa tambalanan.

Base sa inisyal nga imbestigasyon sa kapulisan dunay nitawag kanila nga silingan sa magtiayon tungod sa matud pa pagbubo og gasolina sa bana ngadto sa iyang asawa ug giduslitan kini og posporo samtang natulog.

Swerteng nakadungog ang mga kabanay ug gitabangan pagpawong ang kalayo sa ginang samtang ang suspek daling miikyas.

Atol sa pagabot sa mga polis nadala na ang babaye sa mga paryente sa tambalanan ug ang suspek nga nagdunggab sa tiyan aron unta maghikog.

Base sa pamahayag sa mga saksi giingong naglagot sa asawa ang suspek tungod nagtuo nga aduna kini lalaki nga gikabuangan.

Gipaabot nalang sa kapolisan ang ginang kung pasakaan og kaso ang bana.— IBM (BANATNEWS)