Mga vendor sa Carbon Market mag-umol og community pantry

CEBU, Philippines — Malipayong gianunsiyo sa Cebu City Market Operations Division (MOD) nga magtampo-tampo ang Carbon Market vendors alang sa pag-umol og community pantry sa nagkadaiyang area sa Carbon.

Ang maong pantry alang kini sa mga tawo nga naglisod tungod sa pandemiya.

Matud sa hepe sa MOD Irvin Cabales nga kasagaran sa itunol sa vendors mao ang sobra nila nga baligya nga utanon, prutas, karne ug uban pa.

Ug kon daghan og stocks o manobra ang idonar nga produkto posibleng mobutang og mga community pantry diha sa kabaranggayan.

Gibutyag ni Cabales nga adunay himuong tigom tali sa mga representante sa nagkadaiyang vendors sulod karong semanaha aron tukion ang maong plano aron masugdan dayon kini.

Kalabot usab sa mga idonar nga karne gipasalig ni Cabales nga mag-agi kini og inspeksiyon aron maseguro ang kalidad niini ug dili makadaot sa panglawas sa tawo.

Gihangop ni Mayor Edgardo Labella ang maong pamaagi diin makita ang pagkamatinabangon sa mga Sugbuanon.

Sayo pa, si Labella nagkanayon nga dili na kinahanglang mokuha og permit ang mga tawo nga mopasiugda sa maong klase nga proyekto.

Sa laing bahin, nanawagan karon si Cebu City Councilor Alvin Dizon ngadto sa executive department nga iimplementar ang Cebu City Food Bank and Urban Food Gardening Ordinances.

Mao kini ang gipadayag ni Dizon sa iyang privilege speech atol sa session sa konseho sa siyudad sa niaging adlaw .

Nasayran nga sa niaging tuig pa napasar ang ordinansa nga mag-establisar og Food Bank ang siyudad ug aprobado kini ni Labella.

Tumong sa maong ordinansa nga walay magutman panahon sa trahediya o emerhensiya.

Ubos sa maong ordinansa ang Department of Social Welfare and Services (DSWS) maoy modumala sa maong programa. —BDB (BANATNEWS)