Usa ka kawani sa city hall nasikop sa buy bust operation
CEBU, Philippines — Gitanggong karon sa Presento 3 sa Lapu-Lapu City Police Office (LLCPO) ang pusher og shabu nga nadakpan sa buy bust operation, Huwebes sa buntag diha sa La Aldea Buena Mactan sa Barangay Babag, Dakbayan sa Lapu-Lapu.
Si Police Major Joey Bicoy, hepe sa City Intelligence Unit (PIU) sa LCPO miila sa nadakpan nga mao si Robeth Sable Delos Santos, 36 anyos nga nagtrabaho isip Administrative III sa kagamhanan sa Dakbayan sa Sugbo ug lumad nga taga Barangay Suba, Cebu City.
Nakuha sa kapolisan gikan kang Delos Santos mao ang 105 ka gramo nga gituhuang shabu nga nagkantidad og P714, 000.
Nasuta usab sa kapolisan nga nadakpan na kaniadto si Delos Santos may kalambigitan gihapon sa illegal nga drugas.
Samtang laing duha ka mga tawo ang nasikop usab sa managlahi nga buy bust operation diha sa Alaska Mambaling.
Nasikop sa kapolisan sa Mambaling Police station mao si Juvy Pitogo, alyas Juvy, 41anyos, usa ka labandera, taga sitio Naba, Alaska ug Denmark Sanchez, 18 anyos, walay trabaho, taga Sitio Huyong-huyong sa mao gihapon nga barangay.
Nangulo sa maong operation mao si Police Major Dindo Juanito Alaras ug mga kaubanan. Nasakmit gikan kang Pitogo ang 23 ka gagmay nga pakete ug usa ka medium size, samtang kang Sanchez ang 14 ka gagmay nga putos sa gituohang ginadili nga drugas ug buy bust money.
Ang mga dinakpan, nagtingkagol na karon sa bilangguan ug gipaabot ang pagpasang-at ug tukma nga kaso batok kanila nga mao ang pagpayuhot sa ginadili nga drugas. —Rowena D. Capistrano/MEL (BANATNEWS)
- Latest