Skedyul sa Reenactment sa Kadaugan sa Mactan hayan usbon

CEBU, Philippines — Posibleng dili makatambong si Presidente Rodrigo Duterte sa selebrasyon sa 500th Anniversary sa kadaugan sa Mactan karong Abril 27, 2021.

Kini tungod sa padayon nga pagsaka sa mga kaso sa COVID-19 sa Metro Manila ug pipila sa mga sakop sa gabinete niini ug presidential security group ang natakboyan sa maong sakit.

Suma pa ni Lapu-Lapu City Mayor Junard “Ahong” Chan, dako ug posibilidad nga dili makatunga ang presidente, hinungdan nga nagtinguha siya nga usbon ang schedule sa re-enactment sa Battle of Mactan karon Abril 27.

“There’s a chance nga posible nga ang atong presidente dili makatambong because of this situation nga ang iyang mga PSG nag-positive,” ni Mayor Chan pa.

Ang mayor nitug-an nga inay ipahigayon sa buntag ang reenactment himoon nalang kini sa alas kwatro sa hapon sa mao gihapon nga adlaw.

Gipasabot sa mayor nga kini aron dili na mahasol ang mga guests sa pagbalik sa venue sa liberty shrine sa Barangay Mactan ug mausa na kini gumikan kay ang dakbayan mao man ang mo-host sa gala night event pagka gabii. —Romeo T. Limpangog/MEL (BANATNEWS)