3 ka notadong tulisan nadakpan sa talisay

CEBU, Philippines — Tulo ka notadong tulisan nasikop sa operasyon batok ilegal nga drugas sa Dakbayan sa Talisay didto sa sitio Ilang-Ilang, Barangay Lagtang niadtong Huwebes sa gabii.

Ang kapolisan sa Talisay pinangulohan ni Police Lt. Col. Gerald Ace Pelare nihimo sa Oplan Limpyo Talisay.

Nadakpan mao sila si Michael Navaja Salinas, 22 anyos; Marjun Cabuenas Enriquez, 25 anyos ug si Jerick Cabuenas Echavez, 24 anyos.

Ang mga dinakpan nakuhaan og gituohang shabu nga nitimbang og 10.9 gramos nga gibana-bana nga mobalor og P74, 120.

Nahibaw-an sa mga otoridad nga ang tulo nalambigit sa sunod-sunod nga pagpanulis ug karon nagtingkagol na sa bilangguan.

Ang ilahang pinakauwahing biktima mao ang drayber sa grab kinsa gikuhaan og kwarta, cellphone lakip na ang pagkaon nga i-deliver niini sa iyang customer. Si Pelare nidugang nga posibleng mohinay na ang mga pagpanulis sa siyudad gumikan sa pagkasikop sa tulo ka notadong tulisan. —MEL (BANATNEWS)