Chan midawat og donasyon alang sa pagpanindot sa Lapu-Lapu

CEBU, Philippines — Gihangop ni Mayor Junard Ahong Chan ang pagdonar sa usa ka pribadong establisamento og mga pintal nga maoy gamiton sa pagpatahom sa palibot sa Dakbayan sa Lapu-Lapu subay sa kasaulogan sa ika- 500 ka tuig nga kasumaran sa Kadaugan sa Mactan karong  Abril 27, 2021.                                   

Lakip sa mipadangat sa ilang donasyon nga mga binaldi nga pintal mao ang Treasure Island Industrial Corporation sa Dakbayan sa Mandaue.Ang marketing manager sa maong kompaniya nga si Anthony Gimenez mao ang mitunol sa maong donasyon nga mokabat sa 125 ka balde nga pintal.

Kini maoy gamiton sa pagtabon sa mga gi-vandalized kun mga gihugaw hugawan nga mga koral.                                    

Ang konseho sa maong dakbayan sa ilang resolusyon ilang gihatagan og pagtugot si Mayor Chan sa pagpirma sa deed of donation ug sa usa ka pribadong kompaniya sa pintal.                                                 

Si Mayor Chan sa iyang pamahayag miingon nga matigayon ang pamintal sa palibot sa dakbayan nga walay gasto ang kagamhanan.

Kini gumikan kay dunay grupo usab sa mga pintor ang mitanyag sa libre nilang serbisyo alang sa pagpamintal sa mga koral o mga poste sa palibot sa dakbayan.                              

“Mao na nga nanghangyo ko, pakilimos ko, para lang na manindot nato ang atoang selebrasyon, nga pwede ra diay bisan walay gasto mga kaigsuonan, mao nang dako kong pasalamat sa Island paints,” suma ni Mayor Chan —MEL (BANATNEWS)