Driver nga nakaluwas sa babaye nga buot maghikog gipasidunggan
CEBU, Philippines — Gihatagan og pasidungog ni Lapu-Lapu City Mayor Junard Ahong Chan ang usa ka V-Hire driver nga milampos sa pagpakgang sa usa ka 23 anyos nga babaye nga misulay unta paghikog pinaagi sa pag-ambak sa 1st Mactan Mandaue Bridge niadtong Abril 9, 2021.
Si Riche Arnado, van-for -hire driver ang nakadawat og certificate of appreciation and commendation gikan ni Mayor Chan tungod sa bayanihon niining gihimo.
Suma pa ni Mayor Chan nga ang gihimo ni Arnado iyang giisip nga bayanihon sanglit napugngan man niini ang maong babaye nga miambak sa nahisgotang taytayan.
"Ikaw ang tinuod nga anak ni Datu Lapu-Lapu nga usa ka hero," ni Mayor Chan pa sa iyang pamahayag. Mapasigarbohon ko sa imong maayong hiyas nga nakaluwas ka og kinabuhi."
Ang nahisgutang babaye nga naluwas ni Arnado ubos karon sa pag-atiman sa City Social Welfare and Development Office (CSWDO) ug kasamtangan karon nga gipaubos sa counseling.
Sa nasayran nga problema sa iyang pamilya ug trabaho ang hinungdan nganong nakahuna huna siya sa pagkutlo sa iyang kinabuhi.
Tinguha sa mayor nga isugyot sa konseho sa Dakbayan sa Lapu-Lapu nga mahatagan og cash reward si Arnado. —MEL (BANATNEWS)
- Latest