Brown: Kristiyanismo nikuyanap sa tibuok kalibutan

CEBU, Philippines — Taliwala sa COVID-19 pandemic ang Papal Nuncio to the Philippines niawhag sa mga magtutuo nga mosangpit sa Holy Family, Jesus, Mary ug Joseph nga bendisyonan, protektahan ug dasigon ang pamilyang Pilipino niining panahon sa kalisod.

“Let us recommit ourselves to our own baptismal calling so that we will be witnesses to the light of Christ not only here in the Philippines but indeed throughout the entire world”, matud sa Papal Nuncio Archbishop Charles Brown sa iyang homiliya sa kasaulogan kagahapon sa 500 Year of Christianity. Ang kalihokan gipahigayon diha sa nahimutang sa Magellan’s Cross sa Plaza Sugbo.

Si Brown kinsa nangulo sa Misa Pasalamat alang sa maong kasaulogan nagkanayon nga sulod sa lima ka sentenaryo ang Katolikanhong pagtuo nagtisok na kini sa kulturang Pilipino.

“Let's lift up to God our thanksgiving. Our gratitude for 500 years of Christianity for having been baptized and for knowing that we are a community of God's children”, matud ni Cebu Archbishop Jose Palma. Samtang si Brown nagkanayon nga ang pagtuo nga nagsugod sa Asya gidala kini sa Europeans dinhi sa Pilipinas ug karon gidala pagbalik sa mga Pilipino ngadto sa Europe ug sa tibuok kalibutan.

“As we reflect on the fact that it was a European expedition organized by Spain that brought the Catholic faith to the Philippines, the gift of Catholic faith were confronted with a paradox and the paradox is this, that Christianity is  faith that begun in Asia and spread throughout the world”, padayag ni Brown.

Si Brown ang nipahigayon usab sa Sakramento sa Bunyag ngadto sa pito ka bata isip tipik sa selebrasyon ug matud niya nga ang iyang gihimo susama usab sa gihimo sa nilabay’ng 500 ka tuig kinsa si Padre Pedro de Valderama nipahigayon usab og pagpamunyag.

Ang mga batang nabunyagan gilangkuban nila ni David Villagracia, John Michael Dragon, Milby Elosendo, April Suan, Billy Cony Pahl, French Cedric Sison ug Jolito  Abaquita Jr.

Sa wala pa ang Misa Pasalamat ug pagbunyag  gipahigayon ang re-enactment sa unang pagbunyag dinhi sa Sugbo sa nilabay’ng 500 ka tuig kinsa ang San Diego Dance Company ang nipresentar niini.

Lakip sa mga nitambong sa kasaulogan sila si Cotabato Archbishop-Emeritus Orlando Cardinal Quevedo, Cebu Auxiliary Bishop Midyphil Billones, Cebu Auxiliary Bishop-Emeritus Antonio Rañola, Palo Archbishop John Du, Talibon Bishop Patrick Daniel Parcon, Ozamis Archbishop Martin Jumoad, Baguio Bishop Victor  Bendico, Maasin Bishop Precioso  Cantillas SDB, CBCP Secretary-General Monsignor Berni Pantin, Augustinian Friars ug ubang mga bisitang pari.

Lakip sa mga nitambong ang mga representante sa nagkalainlaing parokya, opisyales sa gobiyerno, relihiyosong pundok ug uban pa. Sa laing bahin, gihangop sa mga relihiyosong Katoliko ang gipahigayon nga pagmotorkada sa imahen ni Senior Santo Niño ug ingon man ang dakong cross  nga nagsimbolo sa hugot nga pagtuo sa simbahang Katoliko.

Natigayon kini ubos sa pagpasiugda sa kaparian ug mga relihiyosong  Katiloko sa Dakbayan sa Mandaue.

Ang maong kalihokan tipik kini pagsaulog sa ika -500 ka tuig nga kasumaran sa Kristiyanismo sa Sugbo. —/BDB (BANATNEWS)