Ordinansahon alang sa pag-ila sa LGBT giduso

CEBU, Philippines — Niduso og ordinansahon si Sangguniang Kabataan Federation -(SKF-Cebu City) President Jessica Resch alang sa pag-ila sa  Lesbian, Gay, Bisexual, Transgender, Intersex or Questioning (LGBTIQ+) Sector ug pag-umol og SOGIESC Pride Empowerment Council (SPEC) dinhi sa siyudad.

Buot pasabot sa SOGIESC mao ang Sexual Orientation, Gender Identity, Gender Expression, Sex Characteristics.

Usa gihapon kini nga pamaagi nga maalim ang ubang sakop sa maong sektor gikan sa nagkadaiyang diskriminasyon. Base sa Section 11, ang kagamhanan maoy mo-sponsor og trainings, seminars ug uban pa nga mga kalihokan nga mag-ugmad sa equality.

Moestablisar usab ang siyudad og buhatan sa SPEC nga maoy mo-implementar sa mga programa. Ang  SPEC langkoban sa  Mayor o representante niini ;chairperson sa Committee on Social Welfare and Services sa konseho; Association of Barangay Councils President; Head sa Department of Social Welfare Services; city-wide Gender and Development (GAD) Federation President; city-wide SPEC Federation, ug uban pa.

Nag-unang gimbuhaton niini mao ang paghingusog sa SOGIESC empowerment ug development.

Ang tanang barangay moabag usab sa pag-establisar og  SPEC nga magbase sa barangay nga langkoban sa  Barangay Captain; chairperson, sa Committee on Social Services sa barangay council, GAD Focal Person; ug mga representante sa nagkadaiyang grupo sa LGBT.

Kun maaprobahan na ang maong ordinansahon, gahinan kini og P1.5 million nga budget matag tuig gikan General Fund. —MEL (BANATNEWS)