Dili mosugot ipa-autopsy

CEBU, Philippines — Pamilya sa hospital worker nga giingong namatay pipila ka adlaw human nga nabakunahan kontra Covid-19 mipahibalo nga dili sila mokooperar sa himuong imbestigasyon kalabot sa kamatayon niini niadtong Domingo sa gabie.

Ang tigpamaba sa DOH-7 Dr. Mary Jean Loreche miingon nga ilang subayon ang medical record, vaccination record, ug autopsy report sa kamatayon ni Sydney Rose Panimdim, empleyado sa Vicente Sotto Memorial Medical Center aron pagsuta kun ang gikamatyan niini mao ba gyud ang bakuna nga gihatag kaniya.

“The only one nga tinuod maka-determine sa cause of death is to conduct autopsy, which is the final arbiter kung pananglitan masuta kung ang death tungod gyud sa bakuna or ang cause could be another pre-existing condition of that individual,” pasabot pang Loreche sa mga tigbalita kagahapon.

Sumala pa niya, nagpadayon ilang imbestigasyon nga maglakip gikan sa unang pagbakuna sa namatay hangtud sa adlaw nga kini namatay.

“We are conducting the necessary investigation para kana siya mahibal-an nato ang timeline ug makita nato kung wala bay siyay pre-existing condition ug wala ba ni siya maapil pagsuta kadtong gibakunahan siya,” dugang pa niya.

Tungod niini, gihimug-atan sa DOH-7 nga importante gyud nga mosunod ang mga magpabakuna sa medical screening ug matinud-anong tubagon ang mga pangutana.

“We assure the public that there is a medical screening and if you have a pre-existing condition, you need to be check more carefully and diligently para sigurado nga dili kita magkaproblema kung ikaw na ang bakunahan,” si Loreche nagkanayon.

Apan ang inahan ni Sydney Rose nga si Zenaida Panimdim, 58, miingon nga dili nalang nila hasolon ang patay’ng lawas sa iyang anak tungod kay nabun-og na kini.

“Kung among ipa autopsy o unsa mabalik pa kaha ang kinabuhi sa akong anak?” matud pa niya kinsa mibutyag nga daan ng adunay hubak ang iyang anak.

Matud niya nawagtang ang hubak sa anak sa dihang iyang gipakatawo ang manghod niini.

Matud sa inahan, sa dihang giturokan siya sa unang dose sa Sinovac niadtong Marso 9 ning tuiga nibalik ang iyang hubak ug adunay nanggawas nga rashes sa lawas ni Sydney Rose.

Sa dihang nahatag ang ikaduhang dose niadtong Abril 9 gikatahong nisamot ang hubak sa iyang anak ug namatay siya niadtong Domingo sa gabie.

Giangkon sa inahan nga moluom sa iyang gipamati si Sydney Rose mao nga nagtuo sila nga wala kini motug-an sa iyang mga gipamati sa wala pa kini mahatagi sa unang dose ug sa ikaduhang dose.

Ang kapuyo ni Sydney Rose nga si Jemar Villaceran nasagmuyo gumikan kay gidiretso lang og lubong ang iyang pares.

Siya nakapangutana kung nganong gibutang nga suspected Covid ang iyang kapuyo nga giturokan man kini sa bakuna. Ang namatay adunay nahabilin nga duha ka bata nga pulos lalaki.

Samtang nagpadayon ang imbestigasyon bahin sa kamatayon niini, adunay lalaking senior citizen na sab ang giingong nakalas.

Apan si Loreche miingon nga dili pa kini makonsiderar nga may kalabotan gihapon sa bakuna sanglit naghimo pa sila og imbestigasyon bahin niini ug nagkinahanglan pa sila og dugang mga impormasyon sa koneksyon sa bakuna ug sa kamatayon niini.

Apan bisan pa niining mga balita, padayong giawhag sa DOH-7 ang publiko nga magpabakuna gyud kay matud ni Loreche importanteng kombinasyong bakuna u gang pagsunod sa minimum health standards batok sa Covid-19 pandemic.

Gipasalig niya nga kining mga COVID-19 vaccines nga gigamit sa Pilipinas  luwas ug epektibo. –Gabriel Bonjoc ug report gikan sa The Freeman/IBM

Sunog sa Mandaue nagbilin og P15M nga danyos

Moabot ngadto sa P15 milyones ang danyos sa nasunog nga lumber yard sa may Zone 1, Jacinto Mayol Street, Barangay Canduman Mandaue City, kaadlawon sa adlaw nga Martes.

Nadawat ang maong alarma ala- 1:19 sa kaadlawon ug napawong alas-4:35 na.  Ang sunog naglambigit sa usa ka lumber nga giingong gipanag-iya sa usa ka Kent Hsu. Wala hinooy gikataho nga nakalas o naangol niini.

Padayon pa karon nihimo ug imbestigasyon ang Mandaue City Fire Department may kalabutan sa hinungdan sa pag-ulbo sa maong sunog.— IBM (BANATNEWS)