Papal Nuncio motambong sa 500 YOC; 100 nakonpirmahan

CEBU, Philippines — Gumikan sa COVID-19 pandemic pipila lang ka mga arsobispo ang makatambong sa dakong kalihokan sa nasud subay sa selebrasyon sa 500 Years of Christianity ugma sa Siyudad sa Sugbo.

Ang organizers sa kalihokan nibutyag nga adunay last minute cancellations sa mga arsobispo gikan sa ubang probinsiya ug gipahibawo usab nila nga tungod sa gipatumang health protocols limitado usab ang ilahang giimbitar.

Si Padre Mhar Balili, secretary general sa 500 Years of Christianity celebration nibutyag nga 10 ka bishops ang makatambong sa selebrasyon ugma. Apil sa mga mikanselar sa ilang pagtambong sila si Catholic Bishops Conference of the Philippine(CBCP) President ug Davao Archbishop Romulo Valles ug CBCP Vice President ug Caloocan Archbishop Pablo Virgilio David.

Matod ni Balili nga si Monsignor Bernie Pantin maoy morepresentar sa CBCP.

Nasayran nga si Papal Nuncio to the Philippines Archbishop Charles Brown kompirmado nga motambong sa kalihokan ug moabot kini sa Sugbo sa ala 1:30 sa hapon ugma. Si Brown maoy mangulo sa misa pontipika alang sa commemoration sa 500 YOC diha sa Plaza Sugbo diin nahimutang ang Magellan’s Cross. Ang Plaza Sugbo mahimong maka-akumodar og 3,000 ka tawo apan gumikan sa pandemiya 700 lang ka bisita ang gitugotan nga makatambong sa kalih0kan diin sa 700 bisita 400 niini mga organizing staff ug ang 300 nga motambong sa misa.

Ug sa 300 ka motambong sa misa 169 niini representante sa mga parokya sa Sugbo nga naglangkub sa 75 ka pari ug ang uban Local Government Officials ug congressmen.

Gipaabot usab nga adunay national government officials ang motambong apil na niini si National Historical Commission of the Philippines Chairperson Rene Escalante. Sa dili pa ang misa pontipika ipahigayo una ang reenactment sa first baptism.

Ang mga kalihokan sa 500 YOC taposon sa usa ka cultural presentation diha sa Pilgrim Center sa Basilica Minore del Sto. Niño.

Giawhag ang katawhan nga dili moadto sa Basilica atol sa maong kalihokan tungod kay sila makasulod.

Mahimo silang motan-aw sa online pinaagi sa facebook page sa 500 Years of Christianity.  Samtang ang kapolisan moimplementar og hugot nga seguridad pagmentinar sa kahusay ug kalinaw.

Si Police Lieutenant Colonel Wilbert Parilla, deputy director for operations sa Cebu City Police Office nibutyag nga 400 ka police personnel ang ipakatap atol sa kalihokan.

Subay niini, nikabat sa100 ka tawo gikan sa nagkadaiyang parokya sa Archdiocese of Cebu sama sa National Shrine of St. Joseph, Nativity of Mary Parish Canduman, San Roque Parish Subangdako, Our Lady of Fatima Parish Basak, Christ the King Parish Alang-alang, Holy Family Parish Maguikay, Sto, Niño Parish Paknaan, Cebu Metropolitan Cathedral, Our Lady of Mt. Carmel Parish Recoletos, Archdiocesan Shrine of Our Lady of Guadalupe ug Saint Joseph the Patriarch Parish ang niapil sa gipahigayon nga misa ug confirmation sa mga nag-edad og 12-anyos pataas. Nangulo sa gipahigayong misa ug confirmation diha sa National Shrine of St. Joseph sa Dakbayan sa Mandaue si Archbishop John Du sa Palo Leyte uban nila ni Archbishop Jose Palma sa Archdiocese of Cebu, Auxiliary Bishop Of Cebu Midyphil Billones, Bishop Daniel Parcon sa Diocese of Talibon ug Auxiliary Bishop-Emeritus Antonio Rañola.

Kagahapon gipahigayon usab ang ikaduha ka adlaw nga motorcade procession nga nanukad sa Basilica Minore Del Sto. Nino human sa Santos nga Misa dayon gigawas na ang imahen ni Santo Niño ug jubilee cross. Ang motorcade nisubay diha sa South Road Property lahos ngadto sa Barangay San Isidro, Tabunok, Bulacao, Lawaan, Linao balik sa SRP dayon sa Basilica. — Rowena D. Capistrano/BDB (BANATNEWS)