Petsa sa paghuman sa usa ka proyekto sa gobyerno ipa-publikar

CEBU, Philippines — Gitinguha karon ni Konsehal Nestor Archival nga kinahanglan gyud nga ipublikar ang tataw nga petsa gikan sa pagplano hangtud sa kahumanan o durasyon sa tanang kontrata ug memorandum of agreements (MOAs) lakip na ang infrastructure projects nga gisudlan sa city government.

Ang maong ordinansahon giduso na ngadto sa Committee on Laws, Ordinances, and Styling ug sa Committee on Infrastructure alang sa lapad nga pagtoon. Tumong niini nga mapatuman sa kagamhanan ang transparency ngadto sa publiko.

Mahimo usab kini nga instrumento nga mapadali ang pagkompleto sa mga proyekto sa gobyerno. Maglangkob kini sa mga kontrata, MOAs, o mga undertaking nga magmalambigit og infrastructure projects.

Nahisgotan usab sa Section 5 sa ordinansahon nga ang public officers, mga empleyado o mga indibidwal nga makasupak sa provision niini makamulta sa kantidad nga bali og tulo ka buwan nila nga suweldo alang sa unang offense. Unom ka buwan nga suweldo sa second offence, samtang ang ikatulo nga offense, suspensyon sa serbisyo nga dili molapas og usa ka tuig nga walay suweldo.

Samtang ang project contractor masilotan usab sama sa pagkasuspenso og unom ka buwan ngadto sa duha ka tuig sa mga bidding sa city government.

“Should the contract or memorandum of agreement fails to provide the required planned start and end dates and duration of the project, the same shall be unenforceable except however, when the Sangguniang Panlungsod ratifies such contract or memorandum of agreement after proper amendments thereof has been made by the concerned parties,” tipik sa unod sa Section 7 nga nalatid sa maong ordinansahon. —MEL (BANATNEWS)