Upat ka kontraktor gibaharan ni Garcia
CEBU, Philippines — Upat ka mga kontraktor sa mga proyekto sa Kapitolyo gitagalan ni Gobernador Gwendolyn Garcia paghuman sa mga wala nila tiwasang proyekto sa Probinsya sa Sugbo.
Matud pa ni Garcia kining maong mga kontraktor gikontrata sa lalawigan alang sa mga proyekto niini diha sa Talisay City, San Fernando, Carcar City, Sibonga, Argao, Barili, Dalaguete, Sogod, Consolacion ug Tabogon.
Apan nahuman nalang ang gisaad nga adlaw nga ilang humanon ang trabaho wala pa gihapon kini makompleto hinungdan sa kasagmuyo ni Garcia.
“Please don’t make any mistake about it. I’m not going to allow you to slow down our progress here. Kung kamo na lay makadugay, i-terminate ta mo," bahad pa sa gobernador atol sa ilang tigom niadtong Abril 7, 2021.
Ang maong mga kontraktor gimandoan sa gobernador nga paspasan ang trabaho kung dili nila gustong putlon ang kontrata.
“You know very well nga under existing rules, mo-negative slippage ka og 10 percent. That’s already ground for revocation or termination of contract. Now, most of you, ni-variance namo og negative 44, negative 96, diay wa gyud masugdi,” dugang sa gobernador sa report sa Sugbo News, ang gidumala nga news portal sa Probinsya sa Sugbo.
Sumala pa sa Provincial Engineering Office P4.3 bilyones ang budget pagkongkreto ug pagpalambo sa mga provincial ug barangay roads sa pito ka distrito.
Apan nasayran ni Garcia nga pipila sa mga proyekto wala pa gihapon nangahuman sa petsang gisaad nga kini human.— IBM (BANATNEWS)
- Latest
