Health workers nga gipadala sa Luzon napugos lang?

CEBU, Philippines — Pipila sa mga nurse nga gipadala didto sa Manila giingong napugos lang pagsanong sumala pa sa kasaligang tinubdan, apan ang Department of Health-VII mihimakak nga gipugos sila aron tabangan ang mga health care workers sa National Capital Region plus. Si Philippine Nurses Association-Cebu chapter president Joseph Stephen Descallar mikompirmar sa The Freeman, igsuong pamantalaan sa Banat News nga dunay mga gipadalang nurse nga wala napugos lang pagsanong sa mando.

“Regarding sa deployment for NCR kay naay uban pinugsanay nga i-part sa team nga ipadala,” matud pang Descallar. Wala hinuon gitumbok ni Descallar kun diing hospital gikan ug pila ka mga nurse ang gibati nga gipugos sila. Apan bisan pa niini, ang uban kanila nilarga na padung sa Manila.

Laing source nga dili buot magpaila mibutyag nga ang mga gipadalang mga job orders o dili pa regular nga empleyado ug nabalaka silang di na i-renew ilang kontrata o di na sila ma-regular kung si sila mosanong. Dunay uban napugos pagsanong sa mando sa ilang mga labaw kay wa may moboluntaryo. “Way pugsanay, pero walay balibaray,” matud pa sa source nga usa ka doktor kansang kaubang doktor apil sa grupong ipadala didto.

Samtang ang ubang miboluntaryo nagtuong 14 ka adlaw ra sila didto apan sa send-off ceremony nakurat sila nga maabtan sila og tulo ka buwan didto.

“We are in solidarity of the National Government with the good intention to augment nurses for NCR, but we always rely and respect the nurse’s decision,” pagklaro ni Descallar.  Ang tigpamaba sa DOH-VII  nga si Dr.Mary Jean Loreche mihimakak niini.

“We categorically deny this. When there was a call to help NCR plus with deployment of health care workers, there was an invitation for them to volunteer and join, “ matud ni Loreche.

“We are very proud of them and we salute their dedication to help in this time of crisis,” sumala pang Loreche. —IBM (BANATNEWS)