CCTO gi-bash sa pag-clamp sa truck ug heavy equipment

CEBU, Philippines — Nihatag og katin-awan ang Cebu City Transportation Office ngadto sa ilang bashers kalabot sa nag-trending nga hulagway sa social media diin ilahang gi-clamp ang dakong truck ug heavy equipment.

Nasayran nga adunay netizens ang nang-react sa pag-clamp sa maong truck tungod kay gikan kini gigamit sa pagtrabaho. Gipasabot sa CCTO ang publiko kabahin TRPP (Temporary Road Parking Permit).

Gipahinumduman nila ang publiko sa ordinansa nga nag-regulate sa pag-parking sa mga truck ug heavy equipment diha sa bisan asa nga kadalanan sa Siyudad sa Sugbo nga gigamit sa construction ug tipik kini sa City Ordinance 2112.

Sayo pa, gipadayag sa maong traffic agency nga lapad ang gibuhat nila nga operasyon karong panahona alang sa kampaniya sa siyudad sa pagbaton og hamugaway nga kadalanan. Nasayran nga niaging adlaw ilaha usab nga gituyok ang mga bike lane ug ang kabukiran diin gipangsita nila ang mga motorista nga nagpataka og babag sa ilang mga sakyanan.

Gawas sa nakahatag kini og kahuot sa trapiko posibleng makatampo usab kini og disgrasya sa kadalanan. Ang CCTO nipasidaan usab kini nga wala sila’y pili sa pag-clamp og sakyanan diin lakip ang government vehicles nga magpataka og plastada i-clamp usab nila kini. —BDB (BANATNEWS)