Vendors patabangon og badlong; Violators ibalhin sa Cogon Ramos gym
CEBU, Philippines — Subling gitigom sa Cebu City Market Operations Division (MOD) ang vendors sa Carbon Public Market ug subli usab kini nga gipasidan-an sa istriktong pagpatuman sa health protocols diha sulod sa merkado.
Giawhag ang vendors nga motabang sa pagpamadlong sa ilang mga kustomer nga wala magsul-ob og face mask.
Karon nga nagkadaghan og balik ang mangomprahay sa Carbon kinahanglang imentinar ang physical distancing.
Si Irvin Cabales, hepe sa MOD nagkanayon nga wala nila wagtanga ang kanunay nga pag-roving sa merkado.
Gawas sa mga tinugyanan sa MOD adunay pipila ka mga sakop sa kapolisan ug Task Force Kasaligan ang nitabang kanila.
Tumong sa maong operasyon sa MOD aron mokunhod ang gidaghanon sa kaso sa COVID-19
Nasayran nga sa first quarter sa tuig 2021 kapin na sa 3,000 ka violators ang nadakpan.
Ang madakpan makabayad kini og P500 nga multa ug kadtong walay ikabayad mopahigayon kini og community service ug ipaubos usab sila og seminar.
Sa laing bahin, mapasalamaton si Konsehal Joel Garganera, deputy chief implementer sa Emergency Operation Center ngadto kang Cogon Ramos Barangay Captain Omar Durano Sr.
Matud ni Garganera nga gipagamit ni Durano ang gym sa Barangay Cogon Ramos isip temporary holding area sa quarantine violators.
Si Garganera nipasalamat usab sa kapitan sa Barangay Tejero Hermogenes Galang ug Kapitan Victor Buendia sa Barangay Labangon sa pagpagamit usab kanhi sa ilang mga gymnasium.
Sa pagka karon gikatakdang i-renovate ang mga gym sa Tejero ug Labangon hinungdan nga tanang quarantine violators ibalhin diha sa Cogon Ramos gym. —Rowena D. Capistrano/BDB (BANATNEWS)
- Latest