CLO mogama og imbestigasyon sa mga polis sa Sawang Calero

CEBU, Philippines — Si Cebu City Mayor Edgardo Labella niawhag sa impartial investigation nga himuon kabahin sa pasangil batok sa mga polis sa Sawang Calero Police Station.

Niining ulahi lang 11 ka polis ang gipasanginlang nangilkil ug nanglugos sa ilang dinakpan ug giing ang maong police station adunay sekretong detention room.

Gimandoan usab ni Labella si City Legal Officer Atty. Rey Gealon nga makig-alayon sa kapolisan sa pagpahigayon og imbestigasyon kalabot sa maong hitabo.

Gihulagway ni Labella nga usa ka “serious allegations” ang gisagubang sa maong mga polis ug dili kini makaiangayon sa ubang mga PNP personnel kinsa nagtinarong sa pagpahigayon ilang trabaho.

Gipahibawo ni Labella nga samtang nagpadayon ang gihimong imbestigasyon batok sa mga polis nga gipangreklamo ihunong una ang paghatag sa ilang allowance.

Ang kagamhanan sa siyudad naghatagan kini og allowance sa mga PNP personnel nga nadestino sa Siyudad sa Sugbo.

Ug kon makita nga inosente sa mga pasangil ang mga polis nga gireklamo anha pa ibalik ang paghatag og allowance kanila. —BDB (BANATNEWS)