Medical workers nibiya kagahapon paingon sa NCR plus

CEBU, Philippines — Gipahigayon kagahapon ang send-off ceremony diha sa Montebello Hotel sa wala pa mobiya ang 50 ka medical workers gikan sa Cebu kinsa nitubag sa panawagan nga motabang sa government’s COVID-19 response sa National Capital Region (NCR) plus.

Nasayran nga 11 ka doctor, 35 ka nurses ug upat ka medical technologists ang nibiya sa Sugbo kagahapon paingon ngadto sa kaulohan kinsa magpundo ngadto sulod sa tulo ka buwan.

Ang maong mga medical worker gikan kini sa Vicente Sotto Memorial Medical Center ug Department of Health-7.

Si Office of the Presidential Assistant for the Visayas (OPAV) Secretary Michael Dino niawhag sa mga medical workers nga dili dayon ma-discourage sa mga hagit nga ilang masugatan samtang naghimo sa ilahang misyon pagtabang sa nagkasaka nga kaso sa COVID-19 sa NCR plus.

Laing awhag ni Dino sa mga medical workers nga kon adunay problema nga mopahibawo lang kini.

Gipasalig ni Dino ang pag-abag sa medical workers sa gikinahanglan nila nga tabang.

Samtang gianunsiyo usab ni Dino nga ang mga medical workers makadawat og P5,000 matag usa kanila kada buwan gikan sa OPAV.

Si Cebu Governor Gwendolyn Garcia ug Cebu City Mayor Edgardo Labella nipasalig usab nga mopaabot og cash allowance sa healthcare workers.

Sa ilang tulo ka buwan nga pag-estar sa NCR Plus, si Garcia mohatag og P5,000 nga monthly allowance sa matag medical worker ug sa ilang pagbalik sa Sugbo laing P10,000 matag usa kanila ang ihatag sa probinsiya.

Ang probinsiya nihagtag usab og vitamins ug air purifiers sa medical workers.

Si Cebu City Councilor Raymond Garcia, majority floor leader ug chairman sa Budget and Finance Committee sa konseho sa siyudad nipahibawo nga ang siyudad mohatag usab og P10,000 kada usa sa mga medical frontliner.

Ug si Mayor Edgardo Labella nisaad usab nga mohatag og dugang assistance sa medical workers. —BDB (BANATNEWS)