Kapolisan gimandoan nga aksyonan ang mikatap nga illegal STL

CEBU, Philippines — Gimandoan na ni Mayor Edgardo Labella ang hepe sa Cebu City Police Office nga si  Police Colonel Josefino Ligan nga mosusi dayon ug gukdon ang paghitak sa giingong illegal nga Small Town Lottery (STL) outlets ug ubang matang sa illegal nga sugal.

“Dili gyud ta mo-tolerate anang illegal gambling dinhi sa city. No way!,” suma pa sa mayor.

Gimandoan usab sa mayor ang city legal officer nga si Atty. Rey Gealon nga pasakaan gyud og kaso ang mga nalambigit sa illegal nga sugal.

Una na nga nabalita  dinhi sa Banat News kagahapon ang pagpadala og suwat ngadto sa mayor ni Kapitan Marciano Ando sa Barangay Carreta gumikan sa pagsulbong sa illegal nga Small Town Lottery ( STL ) outlets sa ilang barangay.

Gibutyag ni Kapitan Ando ang kalabot sa panagtigom niya sa ubang opisyales diin ilang panghinaot nga mahimoan kini og aksyon sa buhatan sa mayor. Atol sa maong tigom, gitambongan usab kini og representante sa kapolisan ug sa Phillipines Charity Sweepstakes Office (PCSO).

Atol sa pakisusi sa konseho sa Carreta ngadto sa  PCSO, nasuta nga naghitak illegal ang mga STL outlets nga naa sa kilid-kilid sa nagkadaiyang dapit sa Siyudad sa Sugbo.

Duna puy ubang STL outlets nga nakababag na sa sidewalks busa nakahatag kini og kahasol sa katawhan.

“Naa pa ta sa pandemya, unya nagbaha pajud ang mga illegal nga sugal, paet jud kaayo,” suma pa ni Ando sa dihang nahinabi sa Banat News.

Dugang pa niya nga luoy usab kaayo ang mga opisyal sa barangay nga kanunay gyud nga madudahan nga nanalipod sa maong illegal nga butang.— MEL (BANATNEWS)