219 ka city scholars gi-awhag nga mokuha na sa ilang allowance

CEBU, Philippines — Gipahibalo sa kagamhanan sa Siyudad sa Sugbo nga duna pa’y city scholars ang wala pa mo-claim sa ilang transportation ug supplies allowance nga gikan sa siyudad.

Suma pa sa Cebu City Scholarship Program (CCSP) nga kinahanglan nga kuhaon na kini sa dili pa maabot ang Abril 16.

Sa taho sa Cebu City Public Information Office,  sa  1,719 ka scholars nga kuwalipikado sa pagdawat og allowance, 1,500  lang ang naka-claim atol sa ilang pag apod apod niini sa miaging adlaw.

Nagpasabot nga duna pa’y 219 ka scholars ang wala pa mo-claim ug ang uban niini  mga tinun-an sa University of Cebu, Cebu Eastern College, ug Cebu Technological University. Gi-awhag sa CCSP ang mga tinun-an nga mokuha na sa ilang allowance sa dili pa ang Abril 16, kay kun dili posibleng maglisud na sila sa pagkuha niini.

“CCSP gently reminds students to collect their transportation and supplies allowances before April 16, otherwise they may be barred from collecting their allowance,” tipik sa mensahe nga namantala sa Facebook page sa public information office sa siyudad.

Una niini si Mayor Edgardo Labella, mipasalig nga mapadayon gyud ang maong programa sanglit alang kini sa kaugmaon sa mga estudyante.

Atol sa distribusyon, istriktong gipatuman ang health protocols. Sanden J. Anadia/MEL

8,700 ka senior citizens sa Mandaue nagpa-rehistro na alang sa bakuna

Mokabat sa 8,700 lamang ka mga senior citizen sa Dakbayan sa Mandaue ang nakaparehistro alang sa pagpabakuna batok sa coronavirus disease. 

Ang maong gidaghanon anaa lamang sa 36 porsiyento gikan sa kinatibuk-ang gidaghanon nga 24, 097 nga validated registered senior citizens sa 27 ka barangay sa maong dakbayan.                                      

Si Subangdaku Barangay Kapitan Ernie Manatad ug Association of Barangay Councils (ABC) president nga maoy chairman sa city’s COVID-19 vaccine board miingon nga  kon i-apil ang wala pa ma-validate sa Senior Citizen Affairs (OSCA) ug ingon man kadtong mao pa lamang gayod ang pag-60  ang panuigon  anaa na gayod sa 36,000 ang kinatibuk-ang gidaghanon sa senior citizen sa Mandaue City.                                 

Gitug-an ni Manatad nga sa ilang gihimo nga pagbisita sa kabalayan nasuta nga daghang  mga seniors nga nagdumili sa pagpabakuna batok sa COVID-19. Kini nagpasabot nga dili tanang na-verify ug na-rehistro nga mga senior citizens sa siyudad ang mabakunahan.  MEL (BANATNEWS)

Karsada sa mga bukirang barangay gi-inspeksyon sa CCTO

Sanden J. Anadia

CEBU, Philippines — Mihimo og surpresang pag-inspeksyon sa kadalanan sa mga bukirang barangay ang Cebu City Transportation Office (CCTO) dili pa lang dugay.

Gipangsita niini ang mga tag-iya og sakyanan nga gapatoyang lang og park sa kadalanan.

Suma pa sa CCTO Deputy Chief of Operations ug information officer sa maong departamento nga si Paul Gotiong nga peligro kaayo sa disgrasya sa bukirang bahin ang mga sakyanan nga gipangbabag.

Matud pa nga gikan sa lapad nga dalan, mogamay na hinoun ang agianan tungod sa binuhatan sa badlongon nga mga motorista.

“Mohangyo lang ta, dili lang nato ipatuyang og babag sa kadalanan ang atong mga sakyanan,” matud pa ni Gotiong kinsa nibutyag usab nga mohimo gyud sila og subsub nga mga pag-roving sa maong mga dapit.

Nagkanayon si Gotiong nga importante kaayo ang kooperasyon sa katawhan aron malikay kini sa disgrasya.

Gipahimagnoan niya ang mga motorista nga tahuron kanunay ang road signs alang sa kaluwasan niini. Pipila sa kadalanan nga gipaubos nila og inspeksyon mao ang Barangay Busay, Malubog Babag ug uban pa.

Una na nga gihimug-atan sa CCTO ang ka importante sa hawan nga dalan aron dili maglisod og agi ang mga sakyanan ilabi na panahon sa emerhensya. MEL (BANATNEWS)