Pribadong sakyanan makasulod na og balik sa Carbon Market

CEBU, Philippines — Balik na sa normal ang sitwasyon sa Carbon Public Market kay makasulod na pagbalik ang mga pribadong sakyanan sa maong merkado.

Kahinumduman aron malikayan ang kasamok sa merkado atol sa pag-obserbar sa Semana Santa gikan niadtong Marso 22 hangtud sa Abril 3 wala pasudla ang mga private vehicles.

Ang pangulo sa Market Operations Division (MOD) Irvin Cabales miingon nga bisan og gipasulod na pagbalik ang mga pribadong sakyanan gipadayon gihapon nila ang istriktong pagpatuman sa lagda sa trapiko sulod sa merkado. Ang mga sakop sa MOD nga deputized sa Cebu City Transportation Office (CCTO) gihatagan na og citation ticket, ug maoy manakop niadtong molapas sa lagda sa trapiko.

“Ang sakit man gud dinhi atong nakit- an mao ang mo traffic og asa mangompra adto sad mohunong, regardless og naay traffic signs, naay no stopping diha ang uban dili gyud mokuan kay maoy naandan so ato ng giundang mao na atong mga enforcers subsob karon sige og panakop”, sigon ni Cabales. Kagahapon nagpahigayon usab og clearing operation ang MOD sa dalan ML Quezon human nakit-an nga duna lang gihapoy wala motuman sa ilahang palisiya nga loading ug unloading lang sa maong dapit.

Gipasabot ni Cabales ang mga sakyanan nga mosulod dihang dapita sama sa mga delivery vehicles karga ug diskarga ra sa ilang baligya ang gitugot apan giingong dunay uban nga gihimong parking area ang karsada.

Naobserbaran usab sa MOD nga menus na ang mga malapason sa health protocols diha sa merkado  gumikan sa abag sa Cebu City Police Office, Task Force K.A.S.A.L.I.G.A.N. MEL (BANATNEWS)