Dugang hugna sa pagpamakuna magpadayon karon
CEBU, Philippines — Magpadayon karong adlawa ang dugang hugna sa pagpamakuna sa Department of Health-7 alang sa medical health frontliners nga nagbase sa Siyudad sa Sugbo nga nag-edad og 18-anyos ngadto sa 59-anyos.
Kini ang gibutyag sa hepe sa Cebu City Health Department Dr. Jeffrey Ibones.
Base sa taho sa Cebu City Public Information Office nga ang vaccination site sa Robinsons Galleria ang aduna ray operasyon karong adlawa diin 105 ka doses lang ang dugang gihatag sa DOH -7 sa siyudad.
Samtang ang Emergency Operations Center nipahimangno ngadto sa publiko nga ipadayon ang pagtuman sa health protocols bisan og niubos ang kaso sa COVID-19 sa siyudad.
Base sa datos sa EOC niadtong Abril 3, 2021 adunay 46 ka bag-ong kaso sa siyudad ug niabot na ngadto sa 1,197 ang total active cases ug 127 ang bag-ong recoveries.
Nasayran nga diha sa New Normal Oasis for Adaptation and a Home (Noah) Complex 326 ang bakante nga beds ug 124 ang kasamtangang nag-estar.
Samtang sa Cebu City Quarantine Center 82 ang bakante, 78 ang pasyente samtang sa barangay isolation centers 801 ang bakante nga higdaanan, 240 ang kasamtangang naka-estar ug ang mga lawak sa hotel nga modawat sa gustong magpa-isolate, 157 ang bakanteng lawak, ug 94 ang adunay naka-isolate.
Si Konsehal Joel Garganera, hepe sa EOC nagkanayon nga ga kinahanglang magmabinantayon gyud kanunay.
“Right now we are going downwards in terms of active cases but we need everyone to be more mindful of the compliance of the basic health protocols because “lockdowns” is no longer an option, we can no longer afford to have one”, dugang ni Garganera. BDB (BANATNEWS)
- Latest
