Barangay nga dili mosuporta sa drug clearing program makasohan
CEBU, Philippines — Hayan mag-atubang og kaso ang barangay nga dili mosanong sa kampanya sa gobyerno batok sa illegal nga drugas.
Kini ang gipadayag ni Jonah John Rodriguez usa sa miyembro sa Cebu City Anti-Drug Abuse Council CADAC ug head sa Cebu City Office for Substance Abuse (COSAP).
Nagkanayon si Rodriguez usa na lang ka barangay ang wa mohatag sa ilang commitment nga motabang sa drug clearing program ug wa motunga sa ilang gipatawag nga tigum.
Kahinumdoman nga gipatawag sa miaging semana sa CADAC ang mga opisyales sa 14 ka mga barangay nga wala kaayo mohatag og kooperasyon sa ilang Barangay Drug Clearing Program, 13 niini ang nisanong na nga mohatag na sila og kooperasyon.
Hinuon gihatagan og laing higayon ang maong barangay nga nahimutang sa south district sa pagtambong sa laing tigum nga gipatawag sa CADAC sulod karong buwana.
“Sa among side, wala gyud mi nagkulang sa pag-reach out sa mga barangay alang sa atoang rehab program. Importante gyud kaayo ang kooperasyon sa barangay,” matud pa ni Rodriguez.
Sa miaging semana niduso ang COSAP sa ilang report ngadto sa tanang station commanders alang sa mga kampanya nila sa pakigbatok sa drugas.
Samtang usa ka 34anyos nga lalaki ang nasikop atol sa buy bust operation sa mga tinugyanan sa Naga City Police Station sa may Sitio Ludo, Barangay Langtad sa maong Dakbayan.
Ang nasikop naila nga si Giovane De Gracia, residente sa maong lugar.
Nasakmit gikan sa dinakpan ang mga pinutos sa ginadili nga drugas, lakip ang buy bust money ug usa ka revolver lakip na ang buhi nga bala. —Rowena D. Capistrano/MEL (BANATNEWS)
- Latest
