Mga resort sa Argao pabantayan; Santa Fe adunay guidelines sa mga turista

CEBU, Philippines — Gipaneguro sa kagamhanan sa Lungsod sa Argao nga mabutangan  og mga polis  ug tanod  sa nagkadaiyang  resort sa ilang dapit aron hugot nga mapatuman ang social distancing ug uban pa nga health protocols sanglit naandan na nga modagsa ang mga tawo nga mangaligo sa dagat panahon sa Semana Santa.

Matud ni Konsehal Regie Sanchez nga ang kagamhanan sa lungsod subsub karon ang kampaniya batok sa COVID-19 ug ang mga konstituwente sa lugar giawhag kini nga motuman sa tanang protocols.

Samtang ang Lungsod sa Santa Fe adunay guidelines alang sa mga turista nga mobisita sa lungsod karong Semana Santa.

Ang mga turista nga taga Cebu Province o gikan sa Mandaue, Lapu-Lapu ug Cebu City kinahanglan lang nga makapakita og paid/confirmed booking sa accredited nga accommodation establishment, QR pass nga giisyu sa hotel, valid ID ug ecological fee sa pagsulod sa lungsod.

Samtang ang mga turista nga gikan sa ubang probinsiya ang ilang rekisitos mao ang medical certificate, paid/confirmed booking sa accredited nga accommodation establishment, QR pass nga giisyu sa hotel, Valid ID ug ecological fee.

Sa mga APOR kinahanglan og company ID ug travel order samtang ang mga residente sa lungsod kinahanglan ra og ID ug address sa lungsod o bisan unsa nga pagpamatuod nga residente kini sa lugar.

Ang mga non-residents nga gusto mopuyo sa ilang mga kabanay sa Santa Fe kinahanglan kini og “letter request gikan sa home owner nga adunay photocopy sa ID nga gi-attached diin adunay na-indicate nga pongalan sa pamilya, location, inclusive dates ug lista sa mga pangalan sa bisita diin isubmiter kini ngadto sa port of entry operations”.         

Kini base sa tourism guidelines sa Santa Fe nga gi-post diha sa facebook page sa lungsod.

Kinahanglan usab nga adunay QR pass nga giisyu sa tourism office, valid ID, round trip shipping ticket ug ecological fee. Ang tanang mosulod sa Lungsod sa Santa Fe kinahanglang makapasar sa entry screening.

Ang mga accommodation establishment nga adunay mayor’s  permit mao ray gitugotan nga mo-operate ug gimandoan usab sila nga mosunod sa health standards. Le Phyllis F. Antojado/BDB (BANATNEWS)